Farbfoto: Mir hei enang gfiiret

Iz weissi, was mir i mim truurige Läbe doch eigentlech aues entgeit. Dr Mani Matter. Ja, sini Lieder, die si eifach zytlos. Aber um was geits de iz eigentlech bi dr Liebi? Mi düechts, d Foto-Antworte uf die Frag wärde hüt irgendwie immer wie farbiger. U d Kitsch-Kutschene rase o immer schneuer. Heimlech erfötele mir üs üses Wäutbiud ja scho lang wider schwarz-wiiss. Isch es de zur Zyt vom Mani Matter besser gsi? I gloube nid. Ds Liebes-Kitsch-u-Liebes-Kummer-Karussel dräit sech gloubs scho lang im Kreis. Eifach hüt di Gschwindigkeit, die schwindlet eim. Mir stö am Morge uf: Insta Insta in der Hand – wo bini dr einzigscht im ganze Land? Das gieng ja no, wes nume drum gieng, usezfinge, wär dass mer si. Aber Mensch Mani Matter – warum si mir so truurig drbi?

Dr Mani Matter isch ja scho lang gstorbe, hingäge Many Matters geng no. Mony, Mony, Mony, vilech sogar meh denn je. U d Wärbig meints ja nume guet: Hesch di äch nid gnue agsträngt? Hesch äch nid di richtige Witerbildige bsuecht? Hesch dr äch d Liebi no nid mitem richtige Liquer schön trunke? Oder haut eifach wie’s bi de Fisherman’s Friends heisst: Sind sie zu stark, bist du zu schwach. Di Schwache nimmts u di Starche nimmts nid wunger.

Da isch mir de auso dr Slogan vom galiläische Fisherman’s Friend lieber: Selig si die ohni Follower u die ohni Likes. Das isch natürlech o e gwaagti Ussag. Denn üses mönschleche Läbe uf Ärde, das müesst Dir doch zuegäh, isch mies. Aber ds Glück het äbe ke Priis. Es isch unbezahlbar. Das isch öpis vo däm, wo mer hei usegfunge uf üsere Truwaaje-Suechi. Was isch Liebi? Was isch dr Sinn vom Läbe? Uff, ke Ahnig. Oder wenn schä, de auso würklech nume ä Ahnig, ä ganz ä lislegi. Was mir hingäge geng wider hei usegfunge im Chor – vo wäge «selig si di Schwache»: Was isch dr Schwachsinn vom Läbe. Sprich: Mir hei blöd ta. Me seit ja so schön: Mir hei enang gfiiret. U mir hei o tanzet. U de hei mer gfunge, das chönt me ja de am Konzärt eigentlech o mache.