D Psalme

Ps1 Ps2 Ps3 Ps4 Ps5 Ps6 Ps7 Ps8 Ps9 Ps11 Ps12 Ps13 Ps15 Ps30 Ps31 Ps32 Ps33 Ps34 Ps35 Ps36 Ps37 Ps38 Ps39 Ps40 Ps41 Ps42 Ps43 Ps46 / Ps47 / Ps 53 / Ps 67 / Ps 81 / Ps 82 / Ps 83 / Ps 84 / Ps 85 / Ps 86 / Ps 87 / Ps 88 / Ps 92 / Ps 98 / Ps 100 / Ps 101 / Ps 128 / Ps 129 / Ps 130 / Ps 131 / Ps 132 / Ps 133 / Ps 135 / Ps 137 / Ps 142 / Ps 148 / Ps 149 / Ps 150

Psalm 1: Härzleche Gottwunsch!

© pixabay.com
Bild: pixabay.com

Härzleche Glückwunsch
A aues nid druf Ilaa
Uf ds Läschtere u ds bös Uslache
Härzleche Glückwunsch
A aues nid guet da stah
Zu Gunschte vo de Arme u de Schwache

Härzleche Grichtswunsch
A üsi Glichgültigkeit
Wo sech läbeslang uf ds Läbe vorbereitet
Härzleche Grichtswunsch
A üsi Gottlosigkeit
Wo nes Läbe, wie nes dänkt wäri, vereitlet

Härzleche Gottwunsch
Mir si Spröi
Härzleche Gottwunsch
Mach nöi
Härzleche Gottwunsch
Weck Tröim
Härzleche Gottwunsch
Pflanz Böim

Psalm 2: Di Schwache nimmt’s

Bild: pixabay.com

Ach nei, d Völker wäutwit, si am ume wusle
Äs wird lut und äs wird ärnscht, es chönt eim afa gruusle
Vorhang uf! Aues lost iz uf di Mächtigä!
Gründ git’s ja gnue, wo das Schouspiel berächtigä

Bi somne Schach, da chunt mängs Puurli drunger
Di Schwache nimmt’s u di Starche nimmt’s nid wunger
Doch Gott, wo binis isch, mues afa lache
Das Gross-Getue schiint ihm nid Idruck z mache

Im Momänt tüe sie fliessig um sech stüpfä
Doch sie wärde no richtig erchlüpfä
Gott macht us sim Sohn – passet uf, dir Pharaonä! –
Ä machtlosä Chünig, mit Dorne-Chronä

Dir ganz unger, wo nümm chöit ufstah
Bitte gäht nid uf, dänket dra
Dass Gott einä zum Chünig het gmacht
Ä Machtlosä, wo sä kennt öii Nacht
Wo mit em Shit, wo dir drin sit
No nes Wörtli z rede het

Psalm 3: Trotzdäm schlafi ruhig i

Bild: pixabay.com

S het gchlepft u plötzlech isch es Nacht
U mi verfougt ä Übermacht
Wo uf mis Schiterä tuet wettä
Herr, i bitte: Tue mi rettä!

Stieg doch vo dim Himmu abe
Griif ändlech i, es tuet mi drus
Chum doch zu mir i Schützegrabe
Schlah mine Monschter d Zäng us

Dank dir, Herr, schlafi ruhig i
O we tuusegi mi umzingle
U i weiss, o morn erwacheni
I wirde geng no chönne singe

Du säuber kämpfsch für mi ir Schlacht
Besiegsch mir d Finde über Nacht
O wenni nid druf wetti wettä
So weiss i gliich: Du wirsch mi rettä

Psalm 4: Fromm-si-Phobie?

Bild: pixabay.com

Oh Gott, los zue, please, listen to this
I gibes zuä: I ha Schiss

I ha de öpä gnuä vo däm verlogenä Trubu
I machä mi geng wider säuber zum Tubu
Dir heit ä Frommi-Phobie? E wahrschiinlech zu Rächt
Numä machit dr Herrgott bitte nid schlächt

Stöht uf, löht di Schwache nid la verräblä
Vorhang uf für Gottes Sunnä i de Läbe
Was tuet de letschlech würklech guet?
Oh, Gott, schänk nöiä Muet

Du strahlsch meh Wermi i dä Härz
Aus ds geilschte Läbe ohni Schmärz

So schlafe mir hüt z friede i
Wiu mir bi dir, Herr, sicher si

Psalm 5: Bhaut di usse Verchrümte im Härz grad

Bild: pixabay.com

Gott, wo binis isch
Du fragsch mi: Warum süüfzisch?
I verzeuä drs gärn, ja, i schreiä drs zuä
Am Morge früech weck’s mi, es laht mer ke Rueh

Ds Bösä cha letschtlech vor dir nid bräschtierä
Du lahsch dir nid bluetigä Honig um ds Muu schmierä
Du besiegsch aui Machtgier, wo geng meh wott ha
So dass mir i dim Huus, Herr, chöi i- und usga

Mach vor mir mi Wäg grad, so stogleni ni
Füehr mi dr grächt Wäg, a dä Finde verbi
Ihri Verspräche, die stinkä, s’ligt Hass i dr Luft
Ihri Wort die hei Mundgruch, wienä offeni Gruft

Lasä doch mau stürchlä, ihre Stouz la verstuuche
So dass sie nümm geng houe uf diä süsch eh scho Duuchä
Bis bi dine Grächtä, überau, i aunä Schichtä
Diä wo süüfzä u stöhnä, wiu sä d Gier tuet vernichtä

We sie o ussä verchrümt si, im Härz bhaut sä grad
Mit dim Schild, Herr, beschütz sä – mit dinerä Gnad

Psalm 6: Är ghört mis Gränne

Bild: pixabay.com

(Ä David-Psalm zum singe u mit de Saite darbringe)

Tue nid bestrafe, Herr, i weiss, es isch schlimm
I ha Angscht vor de Gebrüeder Zorn u Grimm
Schänk Gnad, Herr, bi au mim verbocke
I bi inne u usse z töischt erschrocke

Dräi di um, Gott, bitte rett mi Seu
Um dire Güeti Wiuä, schänk mer Gfeu!
Bi de Tote verliert me a di ke Gedanke
Wär wott dir bi de Tote no danke?

I bi müed vom süüfze, i überschwemme mis Bett
I hätt nie dänkt, dass me so viu Träne het
Mini Ouge si bling worde, bitter u matt
Die, wo mi verarsche, traatsche sech satt

Dir Übutäter, göht ändlech dänne
Gott isch bimer, är ghört mis Gränne
Gott gseht, wie’s mer geit, är isch für mi da
Är lost mer zue, mis Gebät nimmt är a

Mini Finde gheie usem Läschteri-Groove
Gli nimmt Gott ne dr Schnuuf
Gli, da höre sie uf

Psalm 7: Z Hiuf!

Bild: pixabay.com

(Was chunt am ne unschuldig Verfougte z Sinn?
Äs Lied vom David
Äs Lied vor Gott
Wäge de Wort vom Kusch usem Stamm Benjamin)

Z Hiuf! Bitte rett mi vor mine Verfouger
Dir vertroui, Gott
Dir vertroui o iz
Wie vom ne Löi wirdi zerrisse, so ganz ohni Retter

Weles Unrächt isches, wo a mine Häng chläbt?
Was hani gmacht, Gott?
Was hani gmacht, dir Lüt?
Woni doch so lang zfride mit öich ha zäme gläbt

I ha doch nie Guets mit Bösem vergulte gha
Grundlos bisch mi Find
Grundlos verfougsch mi
Bis zletscht mis Läbe wirsch z Bode gmacht ha

Verfoug mi doch, mi Fiend, fang mi mit dim Heer
Mis Läbe wott är näh
Mis Läbe z Bode tschaupe
Är laht se links im Dräck la lige, mini Ehr

Wach uf, Herr, u hilf mr, meinsch nid, dass es Zyt isch?
Stang uf i dirä Töibi
Stang uf gäge ds Böse
D Vöuker sehne sech nach dir, du, wo grösser bisch

D Vöuker vo dere Wäut, Gott richtet sie
Doch mir, gib Rächt
Doch mir, gib Rueh
Wiu i i dere ganze Sach eigentlech unschuldig bi

Ds Böse, d Gottlosigkeit, lah se ändlech verga
Du prüefisch d Härz
Du prüefisch d Niere
Ds Guete aber, d Grächtigkeit, la se la bestah

De ächte u de tröie Härz, dene isch Gott äs Schiud
Gott isch grächt
Gott richtets wieder
Äs breicht ne säuber, dä, wo mit Giftpfile ziut

Mit Uguetem wird ds Böse schwanger, Lugine chöme uf d Wäut
Wener Böses im Sinn het
Wener Böses im Härz het
Doch är gheit säuber i d Faue, woner het gsteut

Das Uguete, wo är usheckt, bechunt ihm doch säuber schlächt
Herr, i danke dir
Herr, i lobe di
Du, mi Gott, dr Auerhöchscht, bisch guet u grächt

Psalm 8: Was isch da scho dr Mönsch?

Bild: pixabay.com

(Ä Psalm vom David für we dir singit)

I aune Länder isch di Name herrlech, Herr, du herrschisc
Am Himmu zeisch dini Grössi, Gott, wo binis isch

Doch us de Müler vo Babys ghört me dini Macht
Du, wo’s de Rachgierige z verleide hesch gmacht

Wenni a Himmu luege, dr Mond u d Stärne i dr Nacht
De chumeni i ds Stuune, au das hesch du gmacht

Was isch da scho dr Mönsch, dass du a ihn dänksch?
U was si da scho Babys, dass du di mit ihne abgisch?

Du hesch ne nid viu gringer gmacht aus du bisch
Hesch ne mit Herrlechkeit gchrönt, dr Mönsch

Du hesch ne zum Chef gmacht vo dine Wärch uf dr Wäut
Chef vo dä Schaf, dä Rinder, dä Tier vom Fäud

Chef vo dä Vögu am Himmu, vo dä Fische im Meer
Überau isch di Name herrlech, du bisch binis, üse Herr

Psalm 9: D Uhr, wo für die Ungrächte tickt

Bild: pixabay.com

Mis Härz, das isch i ds Danke cho
Es danket Gott z töifscht i mir unger
I dir Herr, bini eifach froh
I verzeue gärn vo dine Wunger

Di Name, Herr, dä lobeni
Zum Auerhöchschte luegi uf
Mini Finde, vor dir, stürze sie
Sie finge nümme zrügg i Groove

Du tuesch dr Kampf für mi usfächte
Du wisisch se z rächt, die Ungrächte
Du zeigsch ne, wo dass es düre geit
Ihrne Näme droht d Vergässeheit

Zletscht isch geng Gott dr Chef im Ring
O für die herte Mönscheching
Was chrumm isch, macht är wieder grad
Hiuflosne het är Hiuf parat

Wär di kennt, hoffet fescht uf di
Wär dir vertrout, het nöie Muet
Stimmet mit i ds Loblied i
Verzeuet vo däm, wo är tuet

Er vergisst ds Schreie vo de Elände ni
Dr einzig, wo verlässlech isch
Du bisch mi Retter usem Tod gsi
I wott verzeue, wie guet du bisch

I verzeue gärn vo dine Tate
Bi dene, wo i d Stadt wei cho
Du hiufsch, ja du tuesch mi rette
Das sich dr Grund, drum bini froh

D Uhr für die Ungrächte tickt
Är failet üse Machtgier-Dude
I sine Fangnetz het är sech verstrickt
Hie wär Platz für nes Interlude

Ds Unrächt stirbt, dr Krieg vergeit
Die gottvergässni Machtgeilheit
Doch de Arme blibt Gott tröi
Wiu är dänkt a üs, mir arme Söi

Gott, wo binis isch, stang uf
Nimm auem böse Tue dr Schnuuf
Gib ihne doch e Chlupf, dass sie
Erkenne, dass sie Mönsche si

Psalm 11: Was söu öper Grächts da nume mache?

Bild: pixabay.com

I vertroue uf Gott
Dir redet i uf mi
„Flieh, du Vogu
I d Bärge, versteck di!“

D Gwautigä chöme
Mit Boge u Pfile
Heimlech tüe sie
Uf di Härzreine zile

Sie lö d Fundamänt
La zäme krache
Was söu öper Grächts
Da nume mache?

Aber Gott im Himmu
Isch nid bling
Är kennt se genau
Sini Mönscheching

Gott im Himmu
Het’s nid ignoriert
Dass dr Ungrächt
D Gwaut glorrifiziert

Dä Gwautigä wird
Für ihri Gwaut
Füür u Gluetwind
Aus Lohn uszaut

Gott, dr Herr
Är isch grächt
Di gwautlos Frommä
Kennä sis Gsicht

Psalm 12: No rüeft’s zum Himmu

Bild: pixabay.com

(Für die, wo dr Chor tüe leite
Hie ä witre Psaume-Hit
Zum spile uf dr achte Saite
Komponiert vom David)

Oh, liebe Gott, hiuf bitte gschwing
D Verlässigkeit u d Harmonie
Unger dine Mönscheching
Si iz de ändgültig verbi

Me luegt nur druf, was äs eim bringt
Äs brucht nüt, de lügt me scho
Ä Chor, wo doppuzüngig singt
Einisch so u einisch so

Herr, schnid sä ab, die Doppuzunge
Dä Hüchler-Chor, lös ne doch uf
So mänge Coup isch ne scho glunge
De grosse Wort nimm doch dr Schnuuf

So Lüt klugscheissere gschwing
„Mir si rhetorisch brilliant
Ds Diskutiere faut üs ring
Dr Strit mit üs, dä isch riskant“

„Wiu sie di Arme ungerdrücke
Seit Gott, „stani uf, iz isch gnue!“
Dä Wehrlose bräche sie d Krücke
De Achägmachte schänkeni Rueh

Dini Wort, Gott, si rein u klar
Wie im Ofä entschlackets Siuber
Dini Verspräche wärde wahr
Di Arme schützisch vor de Usnützer

No versueche sech d Verbrächer z toppe
No schiints d Gemeinheit sig nid z stoppe
No rüeft’s zum Himmu lut u liis
No loufts bis üs Mönsche fiis

Psalm 13: Trotzdäm!

Bild: pixabay.com

(Vom David füre Chorleiter
Ä Psaum, los zue, so geit er)

Wie lang no, Gott, wie lang no?
Chas si, dass mi vergässe hesch?
Wie lang no, Gott, wie lang no
Verdecksch dis Gsicht, we du mi gsehsch?

Wie lang no, Gott, wie lang no
Mues i vor Todesangscht verga?
Wie lang no, Gott, wie lang no
Mues i es Härz vou Chummer ha?

Wie lang no, Gott, wie lang no
Darf mi mi Find no piksere
Wie lang no, Gott, wie lang no?
Würdsch mir doch numä Antwort gäh

Hiuf mir doch, Gott, hiuf mir doch!
Bring mine Ouge ds Lüüchte bi
Hiuf mir doch, Gott, hiuf mir doch!
Süsch schläferet dr Tod mi i

Hiuf mir doch, Gott, hiuf mir doch!
Mi Find seit: „Di erledigeni!“
Hiuf mir doch, Gott, hiuf mir doch!
Är Jublet, weni gstürchlet bi

Und Trotzdäm, Gott, trotzdäm!
Chani dirä Güeti geng vertroue
Und Trotzdäm, Gott, trotzdäm!
Mis Härz darf wieder Fröid ufboue

Und Trotzdäm, Gott, trotzdäm!
Stimm ig es Danklied für di a
Und Trotzdäm, Gott, trotzdäm!
Wiu du hesch mir so viu Guets ta

Psalm 15: Wär mit dir geit ga loufe

Bild: pixabay.com

Gott, wo binis isch, wär mit dir geit ga loufe
Dere faht ds Härz gli afa sprudle
Gott, wo binis isch, wär mit dir geit ga loufe
Dä mues d Liiche nümm im Chäuer verbudle

Gott, wo binis isch, wär mit dir geit ga loufe
Die faht a, di Stiue z beachte
Gott, wo binis isch, wär mit dir geit ga loufe
Dä mues nüm Schlamme u nüm Schlachte

Gott, wo binis isch, wär mit dir geit ga loufe
Stimmt i dis Wander-Lied mit ii
Gott, wo binis isch, sie wird üs nache loufe
Dini Läbens-Melodie

Psalm 30: Amazing Grace ds Läbe lang

Bild: pixabay.com

Wie du mi fragsch wie, hei d Mönsche Gott je erhobe
De sägi, weisch, es chöis die, wo är us dr Töifi het zoge
Blitz u Donnergoue, sie hei mi nid umbrunge
I ha zue dir, Gott, gschroue u du hesch mi la gsunge

Bisch düre Sumpf düre gwaatet bis zu minere Gruft
Hesch mi wieder beatmet mit Früsch-Läbens-Luft
Ja, ihn erhebe, das chame, drum stiget doch i
I ds Fescht vo sim Name, Gott wird geng binis si

Nur es Blinzle si Töibi, Amazing Grace ds Läbe lang
Ja, Gott, du bisch tröi bi, auem Losla vo dir Hang
Am Abe isch Tod, da isch Chlage u Gränne
Bim Morgerot jublets, we nid drus, de doch dänne

I ha immer dänkt, i wirde nie gheie
S’isch aues es Gschänk, wo darf wachse u gedeihe
D Blueme tod, d Vase, kaputt, aues Schärbe
Hüt no Läbes-Oase, morn scho churz vorem stärbe

Wär fiiret se no, diini ewegi Tröii?
U wär schwärmt no drvo, we mir wieder nur Stoub si?
Letschtlech bischs geng du, wo üs tüet erhäbe
Letschlech bischs geng du, wo laht afa läbe

Du nimmsch üsi Zwangsjagge, mir müesse se nümme an ha
U leisch üs e chice Früehligs-Tanz-Pulli a
Dass mir di chöi erhäbe, ja es geit u geit ni
Du singsch üs ds Lied vom Läbe u mir stimmi mit i

Psalm 31: Du mi Feus

Bild: pixabay.com

Dir vertroui, du mi Feus, los bitte zue
Gott, beschütz mi, ja, bi dir fingeni Rueh
Häb mi, bitte, häb mi, wes mi wieder i ds Netz wott zieh
Mis Sii leg i vor di hi, i mues nüm säuber wöue flieh

Oh, i hasse üses sträbe, s’isch aues nüt, wo bi Gott zeut
I wotts fiire, ds schöne Läbe, ds Schlimme abgä, mi Gott Seu
Mini Finde, mini Finde, finge mi de nid so gschwing
Aber bitte, Herrgott bitte, bitte rett mi, i bi – bitter bling

Bling vergö vor luter Chummer mini Chreft u mini Täg
Zu auer Lascht, tüe sie no läschtre, so gö mir enang us wäg
S sticht geng witer i ds Härz abe
Sie hei Meetings für mir z schade

U doch weisi bi au däm
Mini Zyt i dine Häng
Schänk dis Liecht, chumm mit dim Luft
U schwemm se us die Totegruft

D Lugihüng heilsch vo dr Tollwuet
Zeigsch üs geng wieder, du bisch guet
Die, wo nüm z entgägne hei
Schützisch du bi dir dehei

I ha dänkt, du ghörsch mi ni, doch iz weissi, du bisch da
Grosse Gott, mir lobe di, über Bitte u Verstah

Psalm 32: Tüet d Härze uf dir liisi Tröie

Bild: pixabay.com

Glückwunsch, a die, wo nümme nache treit wird
Glückwunsch a dä, wo Gott sini Schuld vergit
I bi ganz stiu worde vor luter schreie
Bi wach gläge, znacht nach der dreie

Wie Gras, vo ir Summergluet vergeit
Hani aus verdooret vor di treit
Has dir bis ztöifscht dri Iblick gä
U Gottlob, du hesch aus vergä

Drum bättet, we öich ds Läbe fluetet
Gott singt es Lied, wo hiuft dass es guetet
Ds Lied heisst i nime di bir Hang
Bruch d Ouge, ds Härz u di Verstang

Am meischte schmärzt di eigeti Fuscht
Gott füehrt ohni dass är dripfuscht
Drum fiiret viu u tüet nech fröie
Tüet d Härze uf dir liisi Tröie

Psalm 33: Zittrig hoffe mir uf di

Bild: pixabay.com

Fröiet öich ab üsem Gott,
E so wie är isch gits ke zweite
Danket ihm u singet lut,
Griffet töif i öie i d Saite

Was är seit, das isch verlässlech,
Was är verspricht, hautet är i
Unrächt ärgeret ihn grässlech,
D Wäut söu vou vo Güeti si

Dür sis Wort chunt aus i ds tanze,
Ds Land u aui Ozeane
Aui Tier u aui Pflanze,
Wo sich dr Wäg dür ds Läbe bahne

Gott länkt aues i de Bahne,
Är seit „go!“, scho isch’s passiert
U Gott stoppet ds dunkle Plane,
Aus, wo fiises Züüg studiert

Doch me gseht ihm nid i d Charte,
O we me das so gärn wett
Glückwunsch, dir, we du magsch warte,
Bis är letschtlech gwunne het

Bis a d Gränzene vom Wäutau,
Är sprängt totau üses Hirni
U doch kennt är üsi Härz gnau,
wie das geit verstö mir ni

Ds Imperium, wo aues cha,
D Herrscher mit viu Macht Gäud
Chöi nid gäge gäge Gott besta
Niemer uf dr ganze Wäut

D Ouge vo Gott si nid bling,
Für die, wo hoffe, uf nes Wunger
Är kennt sini liebe Ching,
Är kennt ihre Durscht u Hunger

Nur uf ihn hofft üsi Seu
Är isch letschtlech üsi Hiuf
Är git üs a sich Ateu,
u laht üs nid la stah im Schiuf

Sogar im Tod verlahsch üs ni
Zittrig hoffe mir uf di

Plsam 34: Schmöckit und luegit

Bild: pixabay.com

(Vom David nach de Söifer-Gschichte
Ir Reihe „Psaume nöi verdichte“)

Herr i möcht, i möcht es Loblied si
Au Tag sing i und i fröie mi
Dir i öich gchrümmte, won ig o eine bi
Stiget mit mir i das Loblied i

Gott ghörts, we me zuenim schreit
Jubilate, är het mi befreit
Vo aune mine Ängscht u mine Quale
Wär uf ihn luegt, faht plötzlech afa strahle

I bi so öper, wo ir Angscht het gschroue
Är het mi ghört, uf ihn chani vertroue
Schmöckit und luegit wie fründlech dr Herr isch
Wohl däm, wo’s erläbt u nie vergisst

Und wo weiss „zu Gott chani geng ga“
Wo weiss „är isch für mi da“
D Löie hei Hunger, doch üs, üs fäut nüt
Dr Herr, är lehrt ne z läbe, sine Lüt

Möchtisch du es glücklechs Läbe ha?
E Tipp: Fang nid mit komisch rede a
Tue Guets u ds Böse la la si
U jag o geng am Friede hingerdri

Gott ghört u gseht se ständig sini Lüt
Doch o vom böse Tue entgeit ihm nüt
Är ghört ds Schreie, ja u är befreit
Är wo brochni Härze wieder heilt

Dr Chlupf dä steckt üs bis ztöifscht i de Chnoche
Doch Gott luege zune, kene wird üs broche
Wär umegeilet, dä wird’s zletscht beröie
Wär Schutz bim Herrgott suecht, dä darf sech fröie

Psalm 35: Sie hei mir z Nacht ä Gruebe grabt

Bild: pixabay.com

Mini dunkle Schätte, die wo mi uslouge
Liebe Gott, i bätte, we sie mi verfouge
Nimm doch di Schild u stang mr bi
Dr Sturm isch wiud, chumm rett du mi

Oh, bitte zeig, di grosse Gott
Däm, wo mir feig a d Gurgle wott
Sie hei mir z Nacht ä Gruebe grabt
E töife Schacht, mach dass’s nid klappt

Säuber dri, söue sie gheie
Du chasch mi vor Gwaut befreie
Unversehrt blibt mis Skelett
Wiu Gott, dr Herr, mi grettet het

I fürchte mi vor Bschiesser-Wäute
Guet tüe sie mit Bösem vergäute
Mir hets leid ta ihres nid zwäg si
Ha Träne gha vor Emapthie

Doch sie sie hei sech zäme ta
Hei unfrünlech über mi abegla
Herr, säg, wie lang, söu das so bline
Nimm mi ar Hang, tue sie vertriibe

Sie si gäg aues Härzens-Tröie
Rett mi, vor dene böse Löie
Ganz wit riise sie d Schurre uf
Nur Shit u Gwitter chunt drus us

I bi nüm glücklech, s geit mer schlächt
S’isch würklech eifach ungerächt
Oh, Gott, schänk Läbe, so wie d Sunne
Dass sie nid säge, mir hei gwunne

Wach bitte uf u gib mir Haut
Nimm ne dr Schnuf vo ihrer Gwaut
De singi gli mit nöiem Muet
Stimmet mit i, dr Herr isch guet

Psalm 36: Äs chüschelet

Bild: pixabay.com

Äs chüschelet s’isch haub so krass
Das Bitzli Schuld, das Bitzli Hass
Wäms so dänkt, dä het gar nid rächt
So Chüschele beratet schlächt

Äs hirnet fiis bis Znacht im Bett
Bis ds Böse nöis gebore het
Doch di Tröii, sie isch himmuhöch
Mönsche u Tier bisch du nöch

Drum ruehie mr us, i dim schützende Schatte
Du tuesch üs mit däm, wo mir bruche usstatte
Du bisch d Quelle vom Läbe, du bisch ds Liecht, du allei
Luesch guet zu dene, wo nes weichs Härz hei

Beschütz du üs vor fautschem Plagiere
Aues Bschiisse söu d Macht verliere

Psalm 37: Wird nid verruckt ab de Unfaire

Bild: pixabay.com

Wird nid verruckt ab de Unfaire
Wo gärn tüe Ràcht i Unrächt chehre
Ds Gras u d Chrütli doore gli
Doch d Güeti vo Gott geit nid verbi

Är macht dir, was du bruchsch gärn zwäg
Gib ihm ds Navi vo dim Läbeswäg
Si Güeti isch wie d Mittagsunne
Reg di nid uf, är het scho geunne

Trotz aune Gouner, nimms nid schwär
Di wite Härze bhüetet är
Nümm lang u ds Gounere isch us
S wird Zyt für Fescht u Friedensschluss

Am Ungrächte chunt Böses z Sinn
Doch Gott lachet nur über ihn
Sie si mit Waffe ume gloffe
Doch letschtlech hets se säuber troffe

Was het ne iz dr Riichtum gnützt
Die Arme aber het Gott gstützt
Sie hei ke Zins u kei Rabatt
U trotzdäm wärde sie o satt

Dr Mönsch planet, doch Gott länkt
Dr Korrubt hortet, dr Grächt schänkt
Gott, wo binis isch tuet sägne
Är tuet d Wäge vor üs äbne

U gheie mir, schützt üs si Hang
Au Tag ässe mir mitenang
Mir dörfe sogar no verschänke
U üse Blick uf ds Guete länke

Ja, d Grächtigkeit, die tuet sech lohne
Uf wite Fäuder chöi mir wohne
U ständig chöi mir wider lehre
Gott i üsne Härz z verehre

D Machthaber wie die Grächte tot
Doch Gott hiuft ihne i dr Not
Drum hoff uf Gott u häb ke Schiss
Vor Schlange mitem Todesbiss

D Gwauttäter si plötzlech rar
Ds Friedens-Team das bliibt mängs Jahr
D Schreckensherrschaft, die vergeit
Wie’s blüeit u sunnet, stirbt u schneit

Gott isch guet, är steit üs bi
Mir choi i sire Nööchi si

Psalm 38: Mini Finde si eine am gäh

Bild: pixabay.com

Herr, gang nüm mit mir i ds Gricht
I bi vo dine Pfile preicht
Mi Schultere isch ganz zerschunde
Ha eiteregi Dummheit-Wunde

I bi truurig u depressiv
Mi Blick isch läär, dr Äcke stiif
Mis Härz schreit uf vor luter Quau
Mis Sehne, Herr, du kennsch es gnau

Bi bling u chraftlos, bi am chiiche
D Lüt gö über mini Liiche
We’s si mues, bringt me mi haut um
Mis ganze Sii isch toub u stumm

I bi wie öper, wo sech nüm cha wehre
Uf di, Gott, wott i hoffe lehre
Sit doch stiu, wes mir scheisse geit
S’bruucht nüt, i bi i Schmärz zrügg gheit

I weiss, i mues mi o bi Nase näh
Doch mini Finde, die si eine am gäh
D Härzverträier, er-ruef-morde mi
Blib bi mi mir, Gott, verlah mi ni

Psalm 39: Bevor i verga

Bild: pixabay.com

(Ä Psaum vom David-Repetoir
Vom Jedutun füre Chef vom Chor)

I ha mir gseit, blibsch gschider stiu
Wiu geng zrügg z schlah, isch ja nid ds Ziu
So hani gschige, doch es het sehr weh ta
Sider isch i mim Härz es Süüfzer-Füür da

Säg mir doch, Herrgott, wenn bini verbi
Ds Läbe isch nume e Huuch, meh isch’s ni
Ä Huuch wie’ne Schatte, wo znacht chli tuet lärme
Mi Hoffnig tuet einzig, vo dir, mi Gott schwärme

Chumm, rett du mi bitte, mach mi nid zum Spott
Tue doch mis Muu uf, red du für mi, Gott
Nid ds Strube e wäg, i ertrges ni
E einzige Lufthuuch isch d Mönsche-Dasii

Los uf mis Bätte, lueg mis Gränne a
Mach mi wieder munter, bevor i verga

Psalm 40: Jede Tag ä nöiä Song

Bild: pixabay.com

(Ä Psaum vom David-Repetoir
Ufgschribe füre Chef vom Chor)

I hoffe u Gott, ja är ghört mis schreie
Är zieht mi use, wenni i Tribsang gheie
Jede Tag wott är mir ä nöiä Song gä
Lüt ghöres u merke, me cha ne mir nid näh

Glückwunsch ä dä, wo ufe Herrgott vertrout
U nid uf dä lost, wo uf Lugine bout
Dini Wäut isch vou wunger, i chas chuum verzeue
Du wosch keni Opfer, i mues mi nid versteue

Für mi giut, was da gschribe steit i dinere Schriftroue
Was du mi lehrsch, Gott, wott i tue, i wott dir vertroue
I rede vo dim grächt si, i blibe nümme stumm
Vo dir Tröii schwärmeni vor grossem Publikum

Mit dim Erbarme u dir Güeti bisch du für mi da
Wiu Leid u Unrächt hei mi ighout, dr Muet het mi verla
Du rettisch mi gärn, grosse Gott, du ghörsch mi Hiufeschrei
Schäme söue sech au die, wo mir z leid wärche wei

Erstarre söue sie vor Chlupf, die wo mi uslache
S’isch klar, eigentlech chöi mers nid, doch mir wie di gross mache
Dänk doch dra, Gott, wie truurig u arm dass i bi
Bis mi Hiuf u mi Retter, Gott, versuum di ni

Psalm 41

(Ä Psaum vom David-Repetoir
Ufgschribe füre Chef vom Chor)

Glückwunsch a dä, wo di Schwache tuet stütze
Gott wird ne bhüete u beschütze
Vom chrankebett isch är schnäu ume ufgstange
I ha gseit: Bitte, heil mi, i hami vergange

Mini Finde säge fiis: Wenn stirbt är äch?
Chunt eine z Bsuech, de meint är’s mir schlächt
Sie hasse, tüe chüschele, fiis plane u so
Würde sie doch nume i ds stogle cho

Sogar bi de Fründe gibi ds Vertroue uf
Herrgott, bis gnädig, hiuf mer doch uf
I weiss, Herr, du treisch mi, mi Find het ke Chance
Du fahrsch mi zu dir hei uf dinere Strass

Ja Gott, är sig prise, shout it out loud
Für immer u ewig – amen, peace, out.

Psalm 42

(Für dä Korachiter öpis bizbringe
Hie ä Text zum Singe)

Wie ne Glungge im Waud für d Hirsche u d Reh
Bisch du für mi Gott, wenn wirdi di gseh?
I ha Durscht nach dir, s’het mir d Träne tribe
Sie frage mi täglech: Wo isch di Gott blibe?

I dänke so gärn zrügg, wo mir Gott hei gfiiret
Eh u du, trüebi Seu, du, was hesch wider gliiret
Was plagt di, mi Seu, was beunruhiget di?
Mini Seu het Angscht, drum, Gott, a di dänkeni

A di dänkeni, we dini Wäue mi Fluete
I singe dir znacht, täglech schänksch du mir ds Guete
I säge Gott, du mi Feus, warum lahsch mi im Stich
Mi Find fragt mi: Meinsch geng no, Gott kümmeret sich?

Was plagt di, mi Seu, was bringt di i ds wanke?
Vertrou nur uf Gott, i wirde ihm de no danke

Psalm 43

Oh Gott, bitte, hiuf mr, verhiuf mir zu mim Rächt
Tue mi verteidige, wiu sie meines schlächt
Sie, wo ds Schöne u Grächte mit de Füess tüe schutte
Die Böse u Fautsche, die Herte u di Lute

Du bisch Gott, woni geng zuenim cha
Warum, säg warum, hesch mi losgla?
Warum muesi dür ds Läbe, verstosse u truurig?
Verfougt vo de Gägner, i bi paranoid

Schick doch dis Liecht u dini Wahrheit
Wo mir lüchtet u mir uf mim Wäg vorus geit
Sie söue mi zu dim Bärg bringe
Bi dire Wohnig wotti singe

Dert wott i de vor di cho
Du, wo mi zfriede machsch u froh
Wes mr dr Tackt i ds Chini u dr Tanz i d Bei tribt
De danki dir, Gott, wo binis blibt

Eh u du, mini Seu, warum bisch gwittrig druff?
Was ömu o, wüehlt di so uf?
Suech sini Güeti, sini Bachofe-Gluet
Nur scho die Suechi tuet eifach guet

Psalm 46

(Das Lied füre Chorleiter isch vo de Korachiter komponiert
Drbi hei sie sech ar Melodie vom Lied „jungi Froue“ orientiert)

Gott isch für üs e starchi Zueflucht
Ir höchschte Not steit är ür bi
Drum hei mr ke Angscht, we d Ärde bebt
U d Bärge am Zitere si

Söue doch d Wäue sech uftüürme
D Bärge söue ruhig zittere
Ir Stadt vo Gott fliesst früsches Wasser
Sini Lüt tüe nid verbittere

I dere Stadt isch Gott dehei
Darum zitteret sie nid
Nei, är laht se nid allei
Denn, wes wieder Morge wird

D Lüt spinne, d Politker gseh rot
Doch we Gott mau es Machtwort redt
Är isch dr Gott, wo binis isch
De chame de säge, dass d Ärde bebt

Am Jakob si Gott isch e feschti Burg
Chömit u luegit, was är tuet
Är laht d Ärde la erchlüpfe
Är laht se z änd ga d Chriegs-Wuet

D Waffe die rezyklet är
Dr Kriegs-Fahrzüüg schmilze ir Hitz
Höret uf kämpfe seit är üs
Ich bin Gott! erkennets iz

I stah über däm, wo d Lüt usdänke
I stah über dr Wäut, weisch
Am Jakob si Gott isch e feschti Burg
Är isch dr Gott, wo binis isch

Psalm 47

(Äs Lied für Chorleiter ufgschribe
Us dr Korach-Tradition übrig blibe)

Amazing Grace, das isch Musig, Füehlet dr Beat
Fröiet nech u jublit
Är isch dr Chünig vor Wäut, Gott wo binis isch
Wed ihm begägnisch, zitterisch

Ds Grosse Los, judihui, är het üs la gwinne
Är het üs gärn, üs di gringe
Mir si stouz, mir si froh, was üs aus Guets passiert
Gott, wo binis isch regiert

Ds Stadion bebt u d Live-Band musiget
Danket Gott u singet!
Gott isch Chünig, tüet ihm es nöis Lied zum beschte gä
Si Thron het är bestige

D Politik, sigs iz wäutwit oder bi üs dehei
Är het se ir Hang, är allei

Psalm 53

(Ä Kurs vom Daviid, zum vorsinge, we dr tanzit)

E Löu, wo seit, es git ke Gott
Ke Gott, wo eim uf d Finger luegt
U eim när über ds Näscht wott
Abschriisse u süsch strub tuet

Gott beobachtet, wie d Mönsche so druf si
Fragt öper nach ihm, isch öper so schlau
Aui, si abgfaue, aui
Tüe zwöi, drüü no guets? Äbe nid e mau

Wei sech de die Gouner nüt la säge?
Sie frässe Gottes Lüt, sie si im Wahn
Gott tuet se erchlüpfe uf ihrne Abwäge
U wirft se us ihrere chrumme Bahn

Würd Gott doch ds Gschick vo sim Vouk wände
We doch d Hiuf us Zion würd acho

Wo d Schreckensherrschaft würd beände
De fröiti sech Jakob, de wär Israel froh

Psalm 67

(Äs Psaum-Lied zum gä, we dir singit
U denn we dir d Saite zupfit)

Gott, la es Lüüchte uf dim Gsicht si
Gott, bis gnädig, gib di Säge
Dass die, wo nid grad druf erpicht si
Se o finge, dini Wäge

Aui söue zu ihm finge
Gott, wo d Grächtigkeit ifüehrt
Sie söue danke, feschte, singe
Ihm vo letschtlech d Wäut regiert

Las la wachse u la rägne
Dass aui danke Tag u Nacht
Zeig di Güeti, tue üs sägne
Gott, bis binis, zeig di Macht

Psalm 81

(Äs Lied, für we dir d Trube pressit, vom Asaf, em Levit)

Üsi Sterchi isch Gott, jublet ihm zue
Singit, är fröit sech, we mir eine gäbe
Fiiret u feschtet u gäbet ke Rueh
Dr Gott, wo bi üs isch, är schänkt üs ds Läbe

Är het’s am Josef z Ägypte i ds Härz ine gschribe
I ha dir d Laschtene abgno, i ha dr wäg gno, dr Schmärz
Du hesch lut grüeft, wo bisch Gott, doch i bi geng bi dir blibe
Israel, los uf mi, los uf d Stimm i dim Härz

Tue di nid opfere für Gäud u Karriere
I bi dr Gott, wo bi dir isch, wo di i d Freiheit het gfüehrt
Sie lose nid uf mi, sie wei nid vo mir lehre
I la se la fuuschte, we’s ihres Härz nid berüehrt

Würde sie doch nur lose, gsääche sie nur dr Wäg
I würd gärn zue ne luege, würd se gärn i Schutz näh
Lue, di Hassende schnaage, sie si aus angre aus zwäg
I würd sie gärn ilade, ja es Fescht würds de gä

Psalm 82

I dr Hall of Fame tuet Gott richte
Wie lang ds Unrächt no begünschtige?
Lueget o mau zu de Ungerschichte
Rettet se vor de Bluetdrünschtige

Sie hei ke Ahnig, da süüfzet d Ärde
Sie si bsungrig, die wo d Vöuker füehre wei
Doch aui Mächtige wärde mau stärbe
Gott, stang uf, mir ghöre dir allei

Psalm 83

Gott, bis nid stiu, lue, dini Finde spinne
Sie hasse di, sie si im Wahn
Gäge dini Lüt tüe sie ersinne
„Mir rotte us“ isch ihre Plan

Sie si sech einig, mir schlö iz dri
D Schlachtfäuder wärde ize tränkt
Mir si, was früecher Gott isch gsi
Gott lehr se, dass gheit, wär so dänkt

Wie d Spröi wird se dr Wind verwäie
Äm Gwautbrandherd nimm dr Schnuuf
Sie wärde ärnte, was sie säie
Erchlüpf se, de höre sie de uf

De höre sie uf mit verflueche
Er worglet se i ihrem Gwirr
U we sie di, Gott, letschtech sueche
Nimmsch du se zueche, nöch zu dir

Psalm 84

Ä witere Psaum hei d Korachiter parat
Für e Chorleiter, zum spile uf em Instrumänt us Gat

Dini Wohnige, Herrgott, die liebni
Mini Seu, die wott eifach ganz nach bi dir si
Wie d Spatze u d Schwaubeli es Näscht gfunge hei
E so bi o i Gott, bi dir ganz dehei

Glücklech si die, wo mit dir läbe chöi
U wo di chöi lobe, jede Tag nöi
Glücklech isch dä, wo mi dir si Platz weiss
Wo dass är o isch uf sire Piugerreis

Müesse si am dürre Tau entgäge
Hoffe sie uf di u du schänksch ne Räge
Är wanderet u sini Chraft, die nimmt zue
U z letscht fingt bi dir dehei sini Rueh

I ha ke Wunschzedu u glich bringeni vor
Di iz mini Bitte, häb es offnigs Ohr
I dim Huus chönne z wohne, wär’s o nume ei Tag
Isch besser aus aues angre, das isch ke Frag

Ar Schweue vo dim Huus, mi Gott, chönne z stah
Isch besser aus viu Gäud u Macht chönne z ha
Du bisch üses Schild, Gott u üsi Sunne
Du dini Gnad, Gott, hei mir scho gwunne

Du gisch nid nur chli, nei du schöpfsch usem Voue
Glücklech si die Lüt, wo dir chöi vertroue

Psalm 85

(Füre Chorleiter
Ä Psaum vo de Korachiter)

Herr, dis Land, hesch wieder gärn becho
Hesch ds Schicksau nöi zum Guete gwändet
Hesch’s dine Lüt nid übu gno
Hesch ihne ds Herthärz nid agrächnet

Ar Töibi hautisch du nid fescht
Di Ärger, dä isch iz verglüeht
Steu üs wieder här, wie’d’s planet hesch
Bis doch wäge üs iz nüm betrüebt

Wott de di Zorn äch nid verga?
Chöi nid d Ching wenigschtens chli löie?
Söu de nid nöis Läbe entstah?
Das würdi doch dis Vouk so fröie

Lanis dini Gueti gspüre
Hiufis doch, mir si am lide
I wett di Stimm würd zu mir düre
Dringe, i gloub de hätti Friede

Dr Friede git Gott sine Lüt
Doch d Dummheite, die söue sie
La si, s’isch verbi, iz isch hüt
D Vergangeheit verfougt üs ni

We vo Gott sim Land e Glanz usgeit
We d Güeti u d Tröii nümme wit
vonenang lige u d Grächtigkeit
Am Friede nöi es Müntschi git

D Tröii wachst u vom Himmu här
Schiint d Grächtigkeit, dr Ertrag isch gross
S’isch Gott, wo schänkt, ds Guete git är
D Grächtigkeit zieht uf sim Wäg vor ihm los

Psalm 86

(Vom David, äs Gebät)

Herr, häb es offnigs Ohr, tue mr doch antwort gä
Wiu i bi arm dran u niedergschlage
Bis mr doch tröi, la mr ds Läbe la si
Hiuf dim Chnächt, uf di verlami

Häb erbarme, dr ganz Tag rüefi zu dir
Gib mir bitte, es fröhlechs Härz, Herr!
Zu dene, wo zu dir schreie, bisch du doch guet
Los doch uf mi, lueh wie’s mr leid tuet

I weiss du gisch Antwort, o wed natürlech nid muesch
Niemer isch wie du, niemer tuet, was du tuesch
Aui Lüt hesch du gmacht u sie gäbe dir d Ehr
Du tuesch grossi Wunger, du allei bisch dr Herr

Lehr mi, di Wäg, Gott, uf ihm wotti Läbe
I möchte i mim Härz inn, dir liisli begägne
U mis Härz söu dir dänke, i bäte di a
Dini Güeti isch besser aus aus woni ha

Usem Toteriich ziehsch mi, woni ine bi grate
I mues nümme töifer i Schlamm ine wate
Schamlosi Lüt steue sich gäge mi
Sie tüe mi bedrohe, uf di lose si ni

Herr du bisch barmhärzig u vou vo Gnad
Hesch geduldig geng Güeti u Tröii parat
La mi dini Chraft gspüre, wes nüm witer geit
Tue di erbarme u schänk mr d Freiheit

Zeig du di ihne, weisch sie gö über Liiche
Sie, wo hasse, sie söue enttüscht drvoschliiche
Sie söues nume merke, du meinsches guet
Du hesch mir ghulfe u gisch mir geng nöie Muet

Psalm 87

Vo de Psaumschriberlinge
De Korachiter, zum singe

Uf de heilige Bärge, dert steit sie, ganz fescht
Dini herrlechi Stadt, Gott, wo du so gärn hesch
Dini Tor die leibt dr Herrgott sehr
Herrlechi Sache, Stadt vo Gott, seit me vo dir
D Vöuker singe: Mir si bi dir dehei
Wiu mir i dir üsi Queue hei

Psalm 88

Füre Wächsschritt u zum singe, e Psaum vo de Korachiter
E Gedicht-Verarbeitig vom Heman, em Esrachiter

Gott, Tag u Nacht rüefi zu dir
Mini Seu ligt brach
I bi am Toteriich nach
Los uf ds stumme Schreie i mir

I ha afe sehr viu Ähnlechkeit
Mit dene wo ir Gruebe lige
Mi Motor isch usgstige
I weiss, wos zum Friedhof düre geit

Du hesch mi dunger hie i Grabe bettet
Mini Chraft vo denn isch plötzlech wäg
I bi allei u gseh ke Wäg
Hie im Fiischtere, womi niemer rettet

Dini Fluet isch über mi ergange
Mini Fründe kenni mi iz nümm
I gruuse se, s’isch richtig schlimm
I cha nid use, i bi gfange

I wirde bling vor luter Chummer
Täglech bätti, Gott, u schreieni
Doch i cha nümme dankbar si
Tuesch a de Tote keni Wunger?

Isch dini Güeti o im Grab bekannt?
Kennt me dini bi de Tote
Dini Wunger a de fischtere Orte
Dini Grächtigkeit im vergässene Land

Ja, i schreie zue dr, scho am Morge
Warum hani grad gar ke Gfeu
Warum verstossisch mini Seu
Weni i di sueche, blibsch verborge

I bi geng fasch gstorbe, scho aus Teenie
Mir schiesst dr Chlupf dür March u Bei
Bis d Fluete mi umzinglet hei
Di Schrecke Gott, ertrageni ni

Mini Fründe wie nümm bi mer si
Mini Gfärtin isch d Fischteri

Psalm 92

(Hie e witere vo dene Psaumi, für am Schabbat beziehigswiis Sunti)

Wow, es isch eifach, eifach geniau
Am Herrgott z danke, dir, Gott, chönne z singe
Gnad, scho am Morge hesch se für üs parat
U ir Nacht dörfe mir dini Wahrheite finge

Töne, söue d Gitarre u d Stimme, die schöne
Schlagzüg u Bass, die mache o mit
Singe, wei mr, wiu du, dini wärch tuesch voubringe
mir danke, dass es d Ärde u üs Mönsche git

Träne, chöme mir, wenni afa erwähne
phenomenau, dini Schöpfig fahrt i
Danke, chani nume, Herr dini Gedanke
Himmunomau, müesse die de töif si

Dumm, wäris eifach, täti me sech nid drum
z danke für das, wo me dankbar cha si
Gottlos, schiints mengisch, d Ungrächtigkeit gross
Wed Gott lobsch, de red drbi, ds Leid niemaus chli

Trotzdäm, isch ds Wort wo passt, trotz auem däm
Dörfe mir lobe u dörfe mir danke
Schiessig, cha ds Läbe si, gloub mer, das weiss ig
Trotzdäm gloubeni, Gott chunt nid i ds wanke

Kaiser, hei gwüetet, was sie hüt tüe, weiss er
Gott git nid eifach de Machtlose Macht
Gäuder, wo fliesse, abghouzeti Wäuder
Gott kämpft gäg ds Böse e angeri Schlacht

Fiine Humor het är, Wärchzüüg im chliine
U ds Universum glich ganz fescht ir Hang
Erlöse tüegsch du üs de einisch vom Böse
mir wage üs z sehne, geit’s äch no lang?

Aut wäre mir, e so louft das haut
Doch ds Härz, das blibt fruchtbar, ganz früsch u es blüehit
Funke vor Hoffnig i ds Härz abe gsunke
Är isch’s wo i üs innewachst u wo glüeiht

So gö mir i die witere
Zyte vom Gwittere
Mit fröhlechem Zittere
mir dörfe schitere

U singe trotz auem eifach nomau
Wow, Gott, du bisch eifach, eifach geniau,

Psalm 98

Tüet am Herr es nöis Lied singe
Wiu är tuet geng wieder Wunger voubringe
Är tuet heile, was i d Nacht isch gheit
Är zeigt aune sini Grächtigkeit

Är vergisst nie sini Tröii u Gnad
Aui gseh, ja, är het Heilig parat
Jublit Gott zue, tüet ihm singe u feschte
Gäbit eine uf öine Saite zum Beschte

Mit em Bläser-Ensemble lobit dr Herr
Ghörit dir ds Bruuse, dr Lobpriis vom Meer
D Flüss chlatsche i d Häng i d Bärge si froh
Sie fiire für Gott, wo einisch wird cho

Wo einisch wird cho, wes am Ändi zue geit
Was chrumm isch, wird är richte, mit sire Grächtigkeit

Psalm 99

Gott isch Chünig, i dr Wäut isch öpips los
Är luegt zu de Vöuker, är isch gross
Sie söue di Name priise, wiu är heilig isch
Du luegsch, dass du Grächtigkeit schaffisch

Bätit Gott a vor sim Fuessschämeli
Die wo zuenim rüefe, är lost uf sie
Us dr Wulchesüüle hei sie di chönne vernäh
Gott, wo binis isch, du tuesch vergä

U o wed d Fouge vo de Tate z gspüre gisch
Giut: Bätet ihn a, wiu är heilig isch

Psalm 100

Ä Psalm aus Dank, juchz für Gott, aui Wäut
Läb für ihn vou Fröid, är wo d Gsichter erhäut

Är het üs gmacht u zwar genau so
Wie mir si isches guet, mir si nid säuber druf cho
Lobet u danket u errinneret nech
Si Gnad u Wahrheit, die blibt, är isch fründlech

Psalm 101

Vo dir Gnad, Gott, tüe mir Songs schribe
Mir wei probiere uf dim Wäg z blibe
Mis Härz het doch nüt böses im Sinn
I hasse ds Unrächt, es bringt ke Gwinn

Ds fautsche Härz mues vo mir flieh
I lah mi nid heimlech inezieh
I bringe die zum Schwige, wo läschtere
I ha die nid gärn, wo plagiere

I haute Usschou nach de Tröie
Die Ächte sis, wo mi fröie
Was i nid gärn ha, si fautschi Lüt
Desume lüge macht mir nid nüt

Jede Morge dräii de Plagörine dr Hahne zue
Ir Stadt vo Gott hei mer vo Übutate Rueh

Psalm 128

Glücklech isch, wär uf sine Wäge
Gott nid i-kalkuliere tuet
Vo dire Büetz wirsch chönne läbe
Gratuliere, du hesch es guet

Di Frou wird gli am stiue si
D Ching seckle, schön, s geit unerchant
So schlaht bi däm dr Säge i
Wo Gott nid vor si Wage spannt

Gott isch bi der, judihee
Är sägnet di mit Läbesgfehl
Du wirsch no dini Grossching gseh
U dr Friede vom Gott vo Israel

Psalm 129

Es Lied, no eis, für d Piugerreis

Gar mängisch hei sie mi iz gmobbt
Söu Israel i däm Lied singe
Gar mängisch hei sie mi iz gmobbt
Dank Gott chas mi nid i d Chnöi zwinge

Statt säuber bi sich z Acher z fahre
Hei sie mi Rügge pflüegt, brutau
Hei Furche zoge, scho sit Jahre
Doch Gott sei Dank, är kennt mi Quau

Är luegt, dass Grächtigkeit ichehrt
Het d Chnüpple glöst u ds Joch verheit
Het d Furchezieher ds fürchte glehrt
Vor Ungerdrückig mi befreit

Wie ds Gjät wo wachst uf dr Härz-Route
Es dooret gli u mues verga
We d Sunne chunt us chunt cho chute
Isch plötzlech o dr Hass nüm da

E somene Hass-Luftschloss-Boss
Seit me ja o nid bhüet di Gott
I dine Kämpf stets hoch zu Ross
Ganz angers däm, wo ds Guete wott

Psalm 130

Es Lied für die, wo piugere wie
I rüefe dir us mim Abgrund
Oh Gott, los uf mi Hilfeschrei
Los uf das, wo dir z Ohre chunt

Herr, hättsch du e Sünde-Zähler
Säg, wie chönti da besta
Doch di Vergäbig isch geng grösser
Da drfür bätt i di a

I hoffe uf Gott, womi grettet het
Är befreit geng nöi vo Sorge
Vou Sehnsucht warti, dass är redt
No meh aus d Wächter ufe Morge

Bi üsem Gott cha me Gnad finge
Israel, we dir uf Gott wartit
Zletschtemänd wärdet dir singe
Wiu är befreit und är vergit

Psalm 131

Es Lied vom David für we dir piugerit

Du chasch mi Arroganz-frei mache
Herr, mach mi cool u hiuf mer warte
Herr, hiuf mr gränne, hiuf mer lache
Wiu dir schilet niemer i d Charte

So darfi ztöifscht inn glasse si
U mini Sehnsucht findet Rueh
Wie nes Ching zfride bi sim Mueti
Läbe dini Lüt, Herr, uf di zue

Psalm 132

(Eis vo de Lieder für d Tämpu-Piugerer)

Dänk zrügg, Gott, a David, wie säubschlos är isch gsi
Är het dir gseit: Fougendes verspricheni
O nid für nes Nuckli ga i ga lige i mis Zäut
Während du no ke Wohnig hesch uf dere Wäut

Sie hei d Bundeslade gsuecht u iz isch sie da
Wo mir hie wei, vor dim Fuessschämu wei mer uf d Chnöi ga
Chumm, Gott, zu dim Ruehe-Platz bi dr Bundeslade
Dini Prieschter söue d Grächtigkeit wie Chleider trage

Du hesch ne doch gärn, di Chnächt, dr David
Wiis ne nid ab, wenär vor di tritt
Dazumau hesch du ihm das Verspräche gä:
Vo dine Nachkomme wird eine di Thron-Platz inäh

Sie söue dr Bund u mini Vorschrifte Ihaute
Tüe sie das, tüe sie immer dä Thron-Platz verwaute
Dr Bärg Zion isch dä Ort, wo Gott usgwäut het
Aus dä Ruehe-Platz, wo när geng gärn si wett

Was in Zion ufe Tisch chunt, tueni sägne u Zässe
Gibi ou sine Arme, woni nie würd vergässe
Ihri Prieschter trage ds Glück, wie angeri Chleider ann hei
U i luege, dass mini Lüt geng Grund zum juble hei

Wie nes Horn vom ne Stier wachst am David sini Macht
I sim Huus hani es Liecht entfacht
So wie d Chleider hei sini Finde ihri Schang geng drbi
Über ihm aber wird si Chroone am glänze si

Psalm 133

(Es Lied vom David für we dir piugerit)

E Lueg, wie guet dass es doch tuet
Wes Mönsche schön hei mitenang
Sie häufe sech u meines guet
Wie Brüetsch u Schwoscht gä sie sech d Hang

Das schmöckt so guet wie nachem Räge
Wie früsches Tou ufem Gyrsgrat
Für immer schänkt Gott ds nöie Läbe
Är het si Säge geng parat

Psalm 134

Es witers Lied für di Wiudi Zyt
Vo aune Läbes-Piuger-Lüt

Dankit Gott, wo üs aus git
We dir hüt wärchit oder o nid
Heit d Häng i d Luft u jublet lut
Sis Sägensbad geit unger d Hut
Feschtet für ihn di ganzi Nacht
Wunderbar het är aus gmacht

Psalm 135

Hallelujah, hallelujah, lobit dr Herr, lobit
I sim Huus u i sim Hof, dir, wo für ne wärchit
Lobit ne, wiu är isch guet. Singet ihm u tanzit o
Jakob, het är sich erwäut und Israel nooch zue sech gno

Ja, i weiss, dr Herr isch gross, grösser aus jedi Götterschar
Was ihm gfaut, das füehrt är us, überau, s’isch wunderbar!
D Wulche laht är uechezieh, d Bltze la i Bode schlah
Dr Gwitterräge faht mit schütte u dr Luft mit chute a

Z Ägypte het är si Macht zeigt, wo niemer druf hätt gwettet
Vom Pharao furt het är sini Zwangsarbeiter grettet
Zu sine Lüt, da het är gluegt, är het sim Vouk e Erbbsitz gä
Si Name blibt, für immer wird me sich a ihn erinnere

Für sis Vouk, ja, da luegt dr Herr geng wieder nöi zum Rächte
Är isch barmhärzig zu aune sine Mägd u sine Chnächte
Ruhm u Schönheit, Macht u Gäut, we me druf vertrout u’s tüe verehre
S verspricht eim viu, doch s hautest nüt, das hei scho vieli müesse lehre

Me dänkt es git eim Sicherheit, es git eim Haut im Läbe
Doch die wo so tüe fuehrwärche, die fuehrwärche vergäbe
Vertrouet Gott, schwärmet vo ihm, är isch würklech für öich da
Vertrouet em Gott vo Israel, denn är isch guet, hallelujah

Psalm 136

Danket Gott, wo aus guet düre treit
Ja, sini Güeti blibt für geng
Danket Gott, wo über auem steit
Ja, sini Güeti blibt für geng

Är allei tuet grossi Wunger
Ja, sini Güeti blibt für geng
Lueg mau, dä Himmu, Gott isch e Künschtler
Ja, sini Güeti blibt für geng

Dä blau Planet het är sech usdänkt
Ja, sini Güeti blibt für geng
Är het üs ds Liecht zum läbe gschänkt
Ja, sini Güeti blibt für geng

D Sunne, wo täglech nöi ufwacht
Ja, sini Güeti blibt für geng
Dr Mond u d Stärne i dr Nacht
Ja, sini Güeti blibt für geng

Am Pharao het är zeigt, was geit
Ja, sini Güeti blibt für geng
Er het Israel vo ihm befreit
Ja, sini Güeti blibt für geng

Mit usgstrecktem Arm u starcher Hang
Ja, sini Güeti blibt für geng
U wo ds Vouk de när am Meer entlang
Ja, sini Güeti blibt für geng

Tuet flüchte, füehrt ärs zmitts dür ds Meer
Ja, sini Güeti blibt für geng
Är besiegt dr Pharao mit sim Heer
Ja, sini Güeti blibt für geng

Ir Wüeschti laht är sini Lüt nid allei
Ja, sini Güeti blibt für geng
Är besiegt d Chünige, wo ne a d Gurgle wie
Ja, sini Güeti blibt für geng

D Ungrächtigkeit, die chehrt iz
Ja, sini Güeti blibt für geng
Gott git üs Land zum Erbbsitz
Ja, sini Güeti blibt für geng

Wo mir am Bode si gsi, het är a üs dänkt
Ja, sini Güeti blibt für geng
Üse Gott, är het üs d Freiheit gschänkt
Ja, sini Güeti blibt für geng

Är wo Mönsch u Tier geng zässe git
Ja, sini Güeti blibt für geng
Dankit Gott, ja, dankit
Ja, sini Güeti blibt für geng

Psalm 137

A de Kanäu si mer ghocket in Babylon
U hei grännet bim Zrüggdänke a Zion

D Instrumänt hei mer lang scho dänne ta
Wo üsi Bewacher plötzlech gfunge hei gha
Mir Chriegsgfangene söue singe
Es Zionslied du Bühni bringe

Doch wie chönte mr vo Gott iz hie ne
Singe, sie wo frömde Götter diene
Jerusalem, sötti di je vergässe ha
Söu mi Hang o ds Saitespiu verla

Wenni mi mau nüm ma erinnere a di
Cha mis Muu o grad vertröchnet si
Wes i mir inn einisch nümme schreit
Jerusalem, dr Gipfu vo mire Fröid

Gott, weisch no, was denn d Edomiter-Horde
Het grüeft, wo Jerusalem isch eroberet worde?
Sie hei grüeft: Los ize, riiset d Stadt i
Bis uf d Grundmuure söu sie zertrümmeret si

Tochter Babylon, du Zerstörerin
Wär’s dir heimzaut, sig riich a Gwinn
Di Nachwuchs isch Gwaut, du Unheilstaat
Glückwunsch, wär ne packt u am Feuse zerschlaht

Psalm 142

(Vom David, e Art Wiisheits-Poesie
Es Gebät, vo denn woner ir Höhli isch gsi)

Luthaus schreieni für Gnad zu mim Gott
Bi ihm chani chotze, i verzeue mi Not
Du hesch immer e Uswäg, weni ke Muet ha
Du zeigsch mir wieni d Fauene cha umga

I luege links, luege rächts, ke Fründ ümewäg
Wo seit: Säg mau, was isch los, gäu, du bisch nid zwäg
S’isch aus abenang gheit, i ha zu dir gschroue
Mi einzig Schlupfwinku, dir chani vertroue

Hiuf mr, mi tüecht, i sig für nüt meh z touge
Rett mi vor au däm, wo mi tuet verfouge
Führ mi us mir Zäue, zeig mir, du bisch da
De git’s de e Party, wiu du Guets hesch ta

Psalm 148

Mein Gott, isch das schön, isch das schön
Gäbet eine uf de Harfe dir Ängle, läck si mir verwöhnt
Gottlob, die Sunne, dä Mond, ja, aui Himmusliechter
Wow, dä Näbu, krass das Gwitter

Mein Gott, lobet, är het’s la wärde
Wow, wie schön isch üsi Ärde
Läck, die Fische, hesch scho gseh
Füür u Hagu, Wouche, Schnee

D Bärge, d Böim, ja, aui schwärme
D Vögu sige u tüe süsch lärme
Dir Mönscheching, wit wäg u naach binis
Dir Seniore u dir früsch verliebte Teenies

Löht üs wie i de Psaume d Irsaelite
Danke für die gschänkte Zyte
Dass es uf ewig geng ertönt
Mein Gott, isch das schön, isch das schön

Psalm 149

Gott isch binis, singet lut
Dir, wo wüsset, är isch guet
Är het üs gmacht, är isch üs tröi
Är isch üs naach, är schänkt üs Föid

D Tanzflächi söu e chli erzittere
Löht Drums u Bass la gwittere
Gott isch zmittas i üsem Härzens-Groove
Am ne Arschloch wie mir hiuft är uf

We i mau wieder aus vertuble
Am Abe darf mis Härz gliich juble
I chüschele ihm aube zue
D Mönschheit isch e blödi Chue

Mit grosse u chliine Diktatore
Lehr se Maniere, es isch e tummi Moore
So meini juble, [Seufzer], henu, ja
Amen. U trotzdäm Hallelujah

Psalm 150

Hallulja, lobet Gott, Gott, wo binis isch
Är wo üs zrügg füehrt zu sim Lagerfüürli-Tisch
Lobet ne für aui sini Tate
O grad a üs, mir us üser Sicht missratne

Lob ne für sini Liebi, sini Geduld
Lob ne Rock-Band, lob ne DJ-Pult
Lob ne, öb schön oder gruusig
Lob ne Orcheschter, lob ne Guggemusig
Aues wo darf Schnuuf zum desume techle ha
Lob, Gott isch binis, Halleluja!